今晚突然好想食三文魚同蒸蛋，但又唔知煮咩好，其實可以煮個日式晚餐，不過例牌動作都要問過袁生先得，又係時候whatapps下佢，袁生話咁快就覆，而答案梗係冇問題，仲好似好開心添
可能袁生平時鐘意食日本菜的關係，咁袁太想食三文魚同蒸蛋，究竟點整好呢 ???
過左一陣，終於決定到，三文魚就整拌飯，蛋就整茶碗蒸，另外再煮多個三文魚頭湯，簡簡單單的日式晚餐好快咁就完成
個茶碗蒸滑嘟嘟，袁生都不知幾鐘意，三文魚拌飯就更加好味，另外三文魚頭湯又香，不過袁生就唔太好三文魚頭，所以個三文魚頭就落左係袁太口中，因為平時我都好鐘意食魚頭，
整體上，袁生對今餐日式晚餐的評價都相當之高，仲叫袁太下次整個海膽茶碗蒸俾佢食 !
材料(茶碗蒸) : 雞蛋<1隻>，本菇，蟹柳<適量>，嗚門卷<2片>，日本帶子<2粒>
調味料 : 鰹魚汁，水<適量>，生抽，味淋<少許>
做法:
1. 本菇洗淨切好，蟹柳撕成絲，放入碗中備用
2. 雞蛋打勻後加入調味料拌勻
3. 將蛋汁隔去泡沫，倒入碗內，再蓋上保鮮紙
4. 先用大火蒸3分鐘，再將嗚門卷及帶子放在蛋液上，再轉小火蒸10分鐘即可
材料(三文魚拌飯) : 三文魚柳<2塊>，珍珠米<適量>，日本甜蛋絲<2塊>，白芝麻<適量>
醃料 : 調味雞汁，味淋，生抽<適量>
做法 :
1. 三文魚柳加入醃料醃10分鐘
2. 珍珠米洗淨後加入適量水份煮至熟透備用
3. 燒紅鑊，將三文魚柳煎至兩面熟透後盛起壓碎魚肉，將白芝麻加入魚肉內拌勻
4. 甜蛋切成絲後與做法<3>的材料拌勻
5. 飯放入碗中，將做法<4>已拌勻之材料放在飯面上即可
材料(三文魚頭蘿蔔湯) : 三文魚頭<1個>，白蘿蔔<半條>，薑<3片>，蔥花<少許>
做法 :
1. 三文魚頭洗淨抹乾水份，白蘿蔔去皮切片
2. 燒紅鑊，爆香薑片，將三文魚頭煎至兩面金黃色後加入適量熱水煮至奶白色
3. 用大火煮30分鍾後加入白蘿蔔煮1小時，加入少許鹽調味
4. 盛起加入少許蔥花即可
感謝 袁太廚房 提供以上資料
袁太廚房 的個人日誌: www.elanie-kitchen.blogspot.hk/
