夏日炎炎的天熱，除左食雪糕，冰條外，生果方面莫過於一定係西瓜
大家每次食完西瓜，西瓜皮係咪一定會掉左佢呢 ???
袁太之前都係架，但後來發現原來西瓜皮好有用，其實之前都用過西瓜皮煲湯
真係覺得好好味架，但由於昨晚已經煲左湯，所以今日選擇用西瓜皮整兩個做法
下午的時候去街市買左1/4個西瓜，$18都好大舊
因為袁生平時食西瓜一定要袁太起左西瓜肉放係雪櫃
等佢食既時候可以好方便，袁太同西瓜起完果肉之後，就要諗下究竟用西瓜皮整咩好
掉左佢太浪費喇，所以又係打開雪櫃呢個八寶箱睇下有咩好材料
見到冰箱有雞扒同豆乾，如果將西瓜皮切粒一齊炒的話，唔知味道掂唔掂呢 ???
一於試下先
當袁太將西瓜皮的一半份量切粒後，原來份量都幾多架
咁仲有一半西瓜皮又點算呢 ???
袁太教大家一個好簡單的做法，只需要西瓜皮同蜜棗
放晒落個煲到煲1 1/2小時，放涼後放入雪櫃雪凍，就成為西瓜皮蜜棗水
今次可以用盡晒d西瓜皮真係開心，而家天氣日日都咁熱，大家一定出好多汗
其實西瓜皮仲有迅速補充流失水份的功效架 !
![]( "西瓜皮蜜棗水+西瓜皮豆乾炒雞粒")
![]( "西瓜皮")
左面一塊塊西瓜皮就係整"西瓜皮蜜棗水"(西瓜皮連外皮)
右面一粒粒西瓜皮就係整"西瓜皮豆乾炒雞粒"(西瓜皮要切去綠色外皮)
西瓜皮蜜棗水(凍)+西瓜皮豆乾炒雞粒
材料(西瓜皮蜜棗水) : 西瓜皮<1/4再一半>，蜜棗<8粒>
做法 :
1. 將西瓜皮去掉紅肉，只留白肉及綠色外皮洗淨備用
2. 煲內放入適量水，待滾後加入蜜棗同西瓜皮，用大火煲30分鐘後再轉慢火煲1小時，熄火放涼後放入雪櫃雪凍即可
材料(西瓜皮豆乾炒雞粒) : 西瓜皮<1/4再一半>，豆乾<3塊>，雞扒<1塊>
醃料 : 生粉，糖，生抽，雞粉，胡椒粉，麻油<少許>
做法 :
1. 雞柳解凍後切粒，加入醃料醃30分鐘，豆乾切粒後加入少許雞粉拌勻
2. 西瓜皮去掉紅肉及綠色外皮後切粒備用
3. 燒紅鑊，將西瓜皮落鑊炒香，逐一加入少許水蓋上鑊蓋煮至西瓜皮熟透盛起
4. 再燒紅鑊，爆香豆乾後加入雞粒拌勻，待雞粒8成熟後將西瓜皮回鑊一同兜勻
5. 最後加入少許蠔油調味即可
![]( "西瓜皮豆乾炒雞粒-2")
食完飯，洗完碗，沖完涼，仲有西瓜做生果添，即刻舒服晒，消晒暑lu，~Yeah~!
感謝 袁太廚房 提供以上資料
袁太廚房 的個人日誌: www.elanie-kitchen.blogspot.hk/
