真係焗雞焗上癮，自從袁太愛上焗雞之後，真係簡直餐餐都食雞，何況袁生又冇投訴，不過就算袁生冇投訴，都唔可以重複以前的焗雞食譜，因為袁生唔鐘意日日食重複的餸菜架，真係好鬼麻煩，所以袁太又要諗諗計，之前整過焗沙薑雞，魚露焗雞扒，海南雞，鮑汁煮雞都整過晒，咁今次整咩雞好呢 ??? 唔理喇，去街市買左雞先再算，買完半隻雞，經過雜貨鋪，見到呀姐入緊南乳，如果買包南乳番去用黎焗雞，唔知味道會係點呢 ???
平時南乳只會用黎炆蓮藕排骨，用黎整雞就真係未試過，真係好期待個味道，雖然焗雞係好方便，只要醃完放入焗爐焗完再斬件就可，但醃隻雞都唔知醃左幾多個鐘，今次呢個南乳雞，由於時間關係，只係醃左3小時，雖然都有南乳味，但就覺得唔係好夠，如果下次再整的話，最好醃夠佢一日就最好 !
南乳焗雞
材料 : 新鮮雞<半隻>，南乳<半磚>，錫紙<1張>
醃料 : 糖，麻油，胡椒粉，生抽<少許>
做法 :
1. 將南乳同醃料拌勻成醬，遂一搽在雞內外，放在碟上包上保鮮紙醃3小時
2. 焗爐用200C預熱10分鐘
3. 焗盤放上錫紙，將雞及汁料放在錫紙上，再將錫紙封口
4. 放入焗爐用200C上下火焗30分鐘，取出剪開錫紙面，再放入焗爐焗10分鐘
