夏天一般都會煲瓜類湯
但又唔想煲節瓜,冬瓜,飲得多都有少少厭
其實以前袁太一向都想煲蜜瓜湯
但袁生唔鍾意甜湯,所以就打消念頭
直至某一日
袁生話想食蜜瓜做飯後果
咁啱晒喇,袁太一於食住上
同袁生講,我去街市買半個蜜瓜番黎
一半就用黎煲湯,一半就用黎做飯後果,咁好冇
袁生個答案,居然話好
咁就一於實行煲蜜瓜湯喇
冰箱有螺頭,咁去街市買雞腳,瘦肉就可以喇
雖然煲出黎啖湯真係甜甜地
但袁生反而幾鍾意飲喎!
~蜜瓜螺頭雞腳瘦肉湯~
材料:蜜瓜-1/4個/螺頭-8個/雞腳-4隻.瘦肉-$10/南北杏-少許,蜜棗-2粒
![]( "蜜瓜螺頭雞腳瘦肉湯-1")
做法:
<1>
螺頭解凍後飛水,瘦肉飛水備用.
<2>雞腳去甲後出水,放入冰水備用,蜜瓜去皮,去籽後切件.
<3>
煲內放入適量的水,放入蜜棗,南北杏,待滾後加入瘦肉,螺頭用大火煲30分鐘.
<4>
再加入蜜瓜,雞腳煲滾後,轉慢火煲2小時,下少許鹽調味即可.
感謝 袁太廚房 提供以上資料
袁太廚房 的個人日誌: www.elanie-kitchen.blogspot.hk/
