恭喜發財！身體健康！萬事如意！馬年行好運！
今日係大年初一，等緊出門拜年，成個星期忙到飛起，今年無用鐘點，自己做清潔做左成個星期；不停開機掠衫摺衫；洗車；撲去上環買金華火腿；買花種花；整糕......日日訓醒都攰到好似做完10個鐘頭gym咁，到左而家終於坐低喺度舒發下喇～ 今日訓到成3點，哈哈，老公返大陸拜年，我就因為對眼做左lasik不便返大陸，而家自己煎糕做我嘅第一餐！我一次過煎左6塊嚟食，omg......原來真係好滯，飲茶都唔掂，奉勸大家，適可而止，哈哈！
講返呢次整蘿蔔糕，好彩有老公幫我捧8斤蘿蔔返屋企，由黃昏整到2點幾，本身諗住整8底，不過整嗰時想「押」實啲，最後得返7底。自家製梗係要足料啲，切臘腸、冬菇、蝦米，仲有撕瑤柱絲都切到手軟，自覺得有冬菇係好味啲嘅，但係整完先知放左冬菇唔可以擺咁多日，因為冬菇會出水，有機會快啲發霉，結果我拿拿臨叫親朋戚友快啲食晒佢，哈！
今次嘅蘿蔔糕係我老公刨嘅～其實最好嘅口感係切絲同刨絲1：1，不過見老公刨得幾爽快，我無做到呢個效果，不過我好快又會再整過，嘻，到時希望做到呢個口感，再派街坊同大家分享！ 其實奶奶叫我唔好整咁辛苦，但係我覺得同人分享真係好開心，所以我係唔介意辛苦少少嘅：P
感謝 MavisT.C. 提供以上資料
