講起沖咖啡, 大家可能會諗買邊部咖啡機好, 全自動, 半自動定係手沖? 事實上, 想咖啡好飲, 咖啡機當然重要, 但磨豆機就應更加講究! 你又可能覺得買市面上既咖啡粉已經可以了, 唔需要買磨豆機. 事實上, 咖啡豆風味係烘焙後大概2-3個月就會完全消失, 而咖啡粉風味更加會係磨粉後數小時內消失. 所以強烈建議大家即磨即沖 .
磨豆機既世界太大了, 由幾十元到幾千元不等, 有人甚至擁有2部磨豆機, 一部Espresso 專用, 一部係其他沖法用. 另外, 手磨, 電磨都有粉絲, 唔好以為手磨一定平, 最近有部手磨要成七千幾蚊!
到底買磨有咩要注意呢?
1. 刀盤 :
刀盤係非常重要既一環, 試想像咖啡豆結構就好似蜂巢咁, 成六角形, 而咖啡風味既細胞就好似蜜糖一樣. 上圖既平行刀盤同錐形刀盤, 都以"夾" 既形式磨粉, 咁樣做可以令咖啡豆依本身既結構分成細粒, 可以將風味保留得最好.
另外, 市面上仲有刀片式磨豆機, 刀片會恨恨地將咖啡劈成細粉, 咖啡細胞被劈細同時, 風味亦隨之溜走. 而且係刀片轉動既過程入面會產生好多熱能, 亦大大降低左咖啡既風味.
2. 咖啡粉平均度
好多人都追求平均粗幼度, 愈平均代表每粒咖啡萃取度愈一致, 而沖出來既咖啡亦都越穩定, 越好飲.
3. "卡"粉程度
除左以上兩點, 我地都想"卡"粉既情況盡量減少, 一來唔會浪費咖啡粉, 二來可以避免前一次磨豆時遺留既咖啡粉影響左風味.
要確保上次既咖啡粉完全清走, 我地可以係磨豆之前先磨一小部分豆洗機既~
講住咁多先啦~ 建議大家買磨豆機之前, 都要做多少少資料搜集!!
============================================
感謝 SiuLamLam 提供以上資料
SiuLamLam的網誌: http://www.siulamcoffee.com/
============================================
