係上一篇 "地球帶左條咖啡皮帶" 入面, 提到咖啡既種植地帶同生長環境, 今次可以講一講咖啡豆既種類.
咖啡豆主要分成 兩種: Arabica 同 Robusta ( 其實仲有 Liberica , Arabustan. 等等, 不過巿場上比較少見). Arabica 係較高海拔地區生長, 空氣及土壤質素較好, 需要較多既照顧先會有好收成, 簡單來講, Arabica 好似貴族子女咁, 比較矜貴, 味道亦都較好, 較有特色. 相反, Robusta 就好似平民百姓, 比較粗生, 生長環境亦比較多蟲害, 味道比較苦澀.
大部分Arabica 豆會用來做Espresso Coffee, 大型連鎖咖啡店都標榜自己用Arabica 豆 . 如果對咖啡有少少認識既人, 就知道咖啡用Arabica 豆係一件正常不過既事, 並唔係一個可以吸引客人既因素.
另外, 基本上Specialty Coffee ( 精品咖啡) 都屬於 Arabica 種, 佢地產量極少, 處理過程經人手過濾劣質豆, 咖啡豆擁有獨特既味道同香氣 , 令人想用盡方法去品嚐真正既味道, 感受佢地既酸度, 厚度, 苦澀度同After Taste . 精品咖啡可以用種植地區區分 ( e.g. 爪哇豆, 耶加雪夫, 衣索比亞...) 或者細分至唔同既莊園.. 就好似紅酒一樣, 唔同地方出產會有唔同既特色!
咖啡市場除左Espresso Coffee 之外, Instant Coffee 亦都佔左好大既席位, Robusta 豆成為 Instant Coffee 主要既原材料, 因為佢咖啡因比較多, 提神效果較強. 坦白講, 飲instant coffee 都係為左提神, 而唔係要享受真正咖啡既味道.. Robusta 就岩曬啦..~
到底精豆咖啡豆應該點樣品嚐呢? 下回再續
============================================
感謝 SiuLamLam 提供以上資料
SiuLamLam的網誌: http://www.siulamcoffee.com/
============================================
