最近鑽研咖啡烘焙，發現咖啡烘焙的世界好大，每一款豆都有屬於佢既烘焙度，烘焙時，機既火力，豆既份量，出豆時間都直接影響咖啡味道，早5秒出豆可以令咖啡完全唔同味，有咖啡店將咖啡豆分別烘32次，由淺炒到深炒慢慢試出Best Point，但因為每批咖啡豆特性唔同，要尋找Best Point，少啲經驗同耐性都唔得！
一杯咖啡，7成味道取決於品種同烘焙度，如果烘焙得唔好，就算barista 技術再好，都無辦法救番杯咖啡...咖啡烘焙度大概分8 級：Light，Cinnamon，City，Full City，Full City+，Vienna, Italian同French，一般來講手沖咖啡（特別係精品咖啡）都傾向用中淺烘焙度，果酸風味會保持得較好，而Espresso（綜合咖啡）多數用深焙，咖啡味道會更濃，苦澀烤味更突出。當然呢個唔係定律，要睇返咖啡豆本身既特性。
要知道咖啡烘焙到咩程度，除左用眼望咖啡豆顔色既轉變外，仲可以聽聲。整個烘焙過程入面，由最淺到最深，咖啡豆會發生兩次爆烈，稱為一爆同二爆，因為咖啡生豆含有水份，係炒既過程入面將水份加熱從而形成蒸氣同壓力，隨住溫度不斷上升，咖啡豆內部壓力不斷加大，直至咖啡豆的外壁無法承受，蒸氣就會衝破外壁，形成一爆，一爆時會聽到好明顯的聲，如果再加熱，咖啡豆剩餘的水氣會再被逼出來，形成二爆，但聲音無一爆咁明顯。其實去到二爆已經係比較深既烘焙，如果再不停加熱，會好容易燒焦咖啡豆。
一般來講，每次烘焙咖啡豆大概十五分鐘，整個過程都唔可以行開，要慢慢留意溫度上升速度同變化，否則可能錯失最佳出豆時機了！
============================================
感謝 SiuLamLam 提供以上資料
SiuLamLam的網誌: http://www.siulamcoffee.com/
============================================
