咖啡店: 蜂大咖啡
地址 : 台灣台北市萬華區成都路42號
飲品 : 爪哇 ( Hot - Syphon ) , 巴西山度士 (Hot- Syphon)
上篇提到西門町既南美咖啡，佢既鄰居就係另一間傳統咖啡店- 蜂大咖啡。比起南美，蜂大感覺較新潮，而提供既食品亦都比南美多.
來到門口已經俾一部大大既烘焙機吸引住，發出一陣陣咖啡香氣，有節奏既咖啡豆翻動聲音，令人好想入試佢地既咖啡。除左烘焙機，仲見到有十幾種唔同既咖啡豆，阿姐不斷幫客人磨豆/磅豆，非常忙碌！門口右面係售賣掛耳式咖啡同料糕餅既櫃檯。左面係賣糕點既位置, 地下坐位比南美多，＂水吧位＂係非常當眼位置。
咖啡種類同南美差唔多，但就有食品俾客人選擇，我來既係早餐時候，好多客人都會選擇咖啡配吐司。
叫左爪哇同巴西山度士，水吧阿姐用虹吸壺沖，水都未上升個陣，阿姐一磨完粉即刻倒入壺，之後水先慢慢升上來，熄火之後，任由慢慢落入下壺。呢個做法大大拉長咖啡泡熱水的時間，咖啡味道有苦澀同煙勳味，感覺好似有少少煮得太耐. 坦白講有少少失望.
係台灣, 無港式既絲襪奶茶 / 咖啡, 換成虹吸咖啡...係蜂大, 感覺有少少似香港某幾間傳統茶餐廳, 只係得好少量既食品 / 飲品俾客人選擇, 阿姐都唔會好似用Timer, 電子磅有小心咁既量份量, 沖煮時間, 佢地要既係速度....賣新鮮烘焙, 唔係沖煮技,巧, 如果想飲一杯好細緻既咖啡, 呢間咖啡店未必俾到你.
我地大概留左30分鐘, 見到老闆不停烘焙, 一袋接一袋, 相信蜂大有供應咖啡豆俾其他咖啡店/ 食肆. 其實佢都有提供精品咖啡, 只係係比較隱蔽既位置. 如果係其他咖啡店, 可能會放係最當眼既位置....
總括來講, 呢間係一間有性格既老字號咖啡店.
============================================
感謝 SiuLamLam 提供以上資料
SiuLamLam的網誌: http://www.siulamcoffee.com/
============================================
