![]()
自從去過新加坡食過天天海南雞飯就一直念念不忘, 再加上我 Honey 好鍾意食海南雞飯. 而早前吾熟吾食 Gigi 姐就正正教大家煮海南雞飯, 所以今晚就嘗試學煮. 其實真係唔難, 而且煮出嚟雞好嫩滑, 雞飯唔油膩 (所以煮出嚟飯唔會油黃色). 薑蓉蘸汁都 OK! 唯獨紅椒蓉蘸汁比較辣咗d. 所以食譜中我減少了指天椒份量. 亦加了醃雞這程序.
嘻嘻.......好嘢! 以後可以隨時煮俾我 Honey, 家人及教友食啦! ^^
材料
雞 (1 隻), 冰水 (1 盆 - 足夠浸雞用), 麻油 (1 茶匙)
醃料
鹽 (1茶匙), 薑汁 (1 湯匙), 紹興酒 (1 茶匙)
薑蓉蘸汁材料及做法
全部材料拌勻: 薑蓉 (約 2 湯匙), 蔥粒 (約 2 湯匙), 鹽 (約 1 茶匙)
紅椒蓉蘸汁材料及做法
全部材料拌勻: 紅辣椒 (2 隻 - 切粒後搗成蓉), 薑 4 片 (搗成蓉)
蒜頭 2 粒 (搗成蓉), 青檸汁 (2 - 3 湯匙), 糖 (1 湯匙)
鹽 (半茶匙), 麻油 (1 湯匙)
海南雞做法
1) 雞清洗乾淨, 用醃料醃約 1 小時, 備用.
2) 燒滾一鍋水, 下雞浸 30 秒即取出, 待水再滾起時, 再次把雞放入鍋內, 重複以上步驟 3次並緊記水必需將隻雞完全浸蓋水. 最後當水再次滾時就加蓋關火, 讓雞浸在鍋內 45分鐘. (雞湯要留用).
3) 之後將雞放入冰水中冷卻, 然後取出及抺乾水份, 用麻油塗勻全隻雞. 最後斬件上碟.
********************************************************
雞飯材料
米 (2 杯), 蒜頭 (1 個 - 連衣), 薑 (約 3 - 4 塊 - 略拍)
鹽 (1 茶匙), 雞湯 (約 3 1/2 飯碗)
1) 白米洗凈, 瀝乾水份, 燒熱鑊落油, 下米兜勻, 盛起放入電飯煲, 放入蒜頭, 薑, 鹽及雞湯, 按掣煲飯. 飯熟後盛起薑及蒜頭就可食用.
