Marco用信用咭積分換咗呢個LC 18cm俾我。收貨時我仲喺香港放緊暑假，回來後一直未諗到煮乜野來幫佢剪綵，所以兩個月仍然原封不動。
尋日同一大班香港朋友食日式放題午餐慶中秋，預咗飽到夜晚都唔使食。突然想到㷛腐竹糖水當晚餐，正好為新煲剪綵！
本來腐竹糖水唔係乜嘢特別野，不過我呢一煲就好特別，絕對值得我用新LC 嚟煮。因為塊腐皮係我喺香港帶返嚟嘅！係媽咪帶我去西洋菜街成利鮮竹買的，是一個上樓腐皮工場。
好多年前試過喺意大利中國超級市場買腐竹想話煮糖水，不過煮極都唔溶，最後出埋攪拌機都唔掂，媽咪話係D腐竹唔靚嘅問題。
今次我哋去買腐皮，主要目的係帶回來做腐皮卷(因為我之前喺中超買的又是蒸咗好耐都唔軟）。我哋去買咗兩斤腐皮兩份分，媽咪仲幫我一塊塊獨立包裝好方便放
冰格保存。新鮮買回來第二日，媽咪示範用腐皮去煲腐竹糖水。㷛一陣就溶晒，我覺得好神奇！仲係超級好味！媽咪教調味最後先落，如果唔係腐竹唔會啉，炆腐竹
一樣，千祈唔好咁快落鹽。
喺雪櫃拎一塊腐皮出來用水沖洗(如果做腐皮卷就唔使沖水，淨係要用濕布抹），略為剪碎，就可以放入滾水中㷛。
㷛咗二十至二十五分鐘之後，D腐皮已經散哂，呢個時候我加適量冰糖，熄火焗十分鐘至糖溶，好好味嘅腐竹糖水完成。滑到完全可以當豆漿飲！
其實中式傳統糖水，我只吃白色的，就是西米露和腐竹糖水。黑色的芝麻糊為了唔好有白頭髮都會食，其餘所有豆類嘅糖水我都唔鍾意。
呢次係我第一次成功煮腐竹糖水，簡單又好味，多謝媽咪！多謝Marco!
感謝 Grace 提供以上資料
Grace的網誌: http://heartsoupkitchen.blogspot.hk/
