早幾日睇番D舊post嘅時候，車輋見到蛋卷就話我好耐無整，佢好想食。咁我又真係整得少咗啲，平均一年先整一次，咁佢開到聲，我都好願意滿足佢。
睇番D舊post，兩隻蛋份量只可以做到二十條，咁今次用三隻蛋份量，一於做多啲。不過有人一路整一路食，所以最後大合照都係得番一半��。
除咗原味，今次試咗黑芝麻。開頭我諗住壓平左先加芝麻，不過有啲雞手鴨腳。車輋話要將啲芝麻放咗落麵糊先，佢話YouTube係咁，又真係好好多。另外做咗兩條肉鬆自己食。
由於呢個蛋卷鐵板，係媽咪幾十年前買落，我帶咗過來意大利，做起來特別有味道。兩塊鐵真係好重，每次反轉都要扎起馬，閉氣，少D力都唔得，我當自己做gym!
約三十條蛋卷：
75g牛油和120g糖混合，分次加入三隻已打散的蛋，再加入82g麵粉。麵糊過篩後放雪櫃雪三十分鐘。
燒熱鐵板，用櫥紙抹少少油，落1 tsp麵糊，每邊大約燒十秒。我冇蛋卷專用鐵通，所以我用筷子捲，用刀幫手。
感謝 Grace 提供以上資料
Grace的網誌: http://heartsoupkitchen.blogspot.hk/
