我終於冬眠回來了！祝大家2015新年開開心心，健康平安！
聖誕大餐後，我便進入了冬眠狀態，全家每日瞓到十點幾十一點先起身，早餐，午餐，下午茶三餐食埋一餐，成個假期竟然冇喺廚房玩。一月七號上班的上班，返學的返學，我嘅私人時間終於返嚟！繼續㷛埋D假期未㷛完嘅劇，今日瞓醒晏覺，終於感覺到冬眠完，係時候去廚房搵D嘢玩！
特登喺香港買咗樽南乳回來，為的就是要做牛耳(之後發現呢度都好似有南乳賣）。如果你唔知乜嘢係牛耳，你應該年紀好細，或者係唔多食零食。喺我心目中，牛耳同崩沙係一齊出現的，買牛耳多數都買埋崩沙，不過崩沙好多時都好硬。
我參考了為食貓的食譜（http://www.leisure-cat.com/frm_1428.htm）
白色麵糰：75g 中筋麵粉，45g 水
啡色麵糰：30g 糖，30g 水煮溶，加一磚南乳，1/8 tsp 梳打粉，2 tsp 油，1/4 tsp鹽 (下次再整，我覺得南乳同鹽可以重手少少），100g 中筋麵粉
麵糰壓薄，白色上面濕少少水放上啡色，捲埋，保鮮紙包住雪一小時後切薄片炸。
感謝 Grace 提供以上資料
Grace的網誌: http://heartsoupkitchen.blogspot.hk/
