喫茶店の味。拿破侖意粉（附食譜）

2015.01.06 ナポリタン

因為肉醬意粉，所以由細到大我都唔鍾意食茄汁類意粉。
肉醬意粉永遠都係醬到意粉分開，而且食嗰陣永遠撈唔勻，啲意粉總係一舊舊乾爭爭。
我最怕食麵食飯啲嘢乾同無汁，所以炒飯我只會食福建炒飯。

後來有次男友話想食肉醬意粉。
一舊舊同乾爭爭都唔再成問題，自己整的話可以確保每條意粉都有汁包住。
就係咁我慢慢開始接受茄汁類意粉。

但無理由食嚟食去都得一款，於是整日本最常見嘅茄汁意粉－拿破侖意粉。

拿破侖意粉=喫茶店
昭和年代嘅日本cafe必定會有拿破侖意粉。
酸酸甜甜係小朋友至愛，大多數日本媽媽都會煮。
如果話拿破侖意粉係日本小朋友第一種接觸嘅意粉一啲都唔誇張。

曾經睇過一個劇集講拿破侖意粉。
裡面提到呢個意粉一定要加芝士粉，食得辣就一定要加埋辣椒仔。
唔試過都唔知，就咁食拿破侖意粉係唔會覺得個意粉有咩咁吸引。
但落埋芝士粉同辣椒仔的話，成件事好唔同。
至於點唔同，大家有機會試吓就會明！

拿破侖意粉（1人份）

• 意大利粉　120g
• 洋蔥（切絲）　半個
• 日本青椒（切絲）　2個
• 維也納香腸（切片）　隨意
• 厚煙肉（切條）10g
• 無鹽牛油　1-2湯匙
• 鹽、黑胡椒碎　適量
• 茄汁　5-6湯匙
• 牛奶　30ml

1. 意粉比包裝指示嘅時間減少1分半鐘將意粉烚好。
2. 喺平底鑊度煮融牛油，將配料炒香到洋蔥開始轉軟身時，加鹽同黑胡椒碎調味。
3. 落茄汁同配料炒勻，加埋烚好咗嘅意粉落鑊炒，最後加埋牛奶炒勻就完成。

* 記得食之前落埋芝士粉同Tabasco呀！

============================================

感謝 tabitachi 提供以上資料

tabitachi的網誌: http://tabitachi.wordpress.com/

============================================