有人要求我整冇餡蘿蔔糕俾佢食
��，咁我就順便記低製作過程，同喜歡食蘿蔔糕嘅朋友分享。由預備材料到開始蒸，我只係用咗40分鐘，我今次特登有睇鐘，證明我嘅做法真係好容易，基本上高難度嘅嘢我都唔會整，所以我得，大家一定都可以。
(1) 預備材料：臘腸剪粒，揸乾冬菇剪粒(冬菇我之前一晚先浸軟)，用幾多隨你喜歡，我就比較孤寒，淨係用咗一條臘腸加幾粒冬菇。蝦米浸軟備用。
白蘿蔔切去頭尾，刨皮。之後好重要嘅就係要磅下蘿蔔幾重，因為蘿蔔嘅重量直接影響之後用幾多粉，所以一定要記低。
(2) 傳統蘿蔔糕最花時間就係人手刨蘿蔔，不過我依個懶人簡易方法當然係用機刨。
如果蘿蔔太粗，放唔入機，可以打直切開。垂直放入機，唔使30秒刨完，唔係講笑。
(3) 刨好嘅蘿蔔加入調味煮，以600克蘿蔔去計，我用冰糖半片，幼鹽1.5茶匙,麻油1茶匙，白胡椒粉少許。由於煮嘅過程片糖會變糖水，蘿蔔亦會出水，所以我沒有另外加入水份。
(4)煮蘿蔔嘅同時，就可以預備粉漿。粘米粉嘅份量係蘿蔔嘅四份之一，即係600克蘿蔔用150克粘米粉，如果有澄麵粉，可以落20克(約粘米粉七分一份量），冇澄麵粉可以直接省略。
加同等份量嘅水開成粘米粉漿（即係150克粘米粉加150克水）。
(5)用1茶匙油炒香薑片，加入冬菇蝦米臘腸炒香後取出薑片。我會記低自己落咗幾多薑，然後攞返出嚟因為試過唔記得咗，食食吓蘿蔔糕食到薑，咁就唔係咁好��
(6)材料炒香後加入粉漿再加入蘿蔔，混合好後便可以用中火蒸大約30至45分鐘
預備時間40分鐘，煮嘅時間40分鐘,成個過程一個半鐘頭已經可以完成, 放涼之後比較容易切片，煎香便可，搞掂!
感謝 Grace 提供以上資料
Grace的網誌: http://heartsoupkitchen.blogspot.hk/
