前幾日帶BB去睇醫生，因為之前BB無端端嘔又肚痾，真係嚇鬼死我，畢竟BB已經11歲半了，即刻打去診所BOOK睇獸醫，經醫生的檢查後，BB只係腸胃有少少唔舒服，食左幾日藥已經冇咩事
當日袁太同BB去睇醫生的時候，醫生問我 : 平時妳會俾咩BB食架 ??? 俾咩佢食，狗糧囉，當我好疑惑醫生點解會咁問的時候，醫生話雖然狗食狗糧係好正常，但日日食同一樣食物都幾悶，所以醫生就同袁太講，其實妳可以抽少少時間整個特別晚餐俾BB食下
等佢可以食多D唔同的食物，其實諗番轉頭，養左BB咁多年，我究竟煮過幾多餐俾佢食呢 ??? 又或者其實我係咪一個好主人呢 ??? 所以某日見有時間，決定整SET DINNER俾BB
所謂SET DINNER，當然有前菜(翠玉瓜吞拿魚乳酪沙律)，主菜(甘旬免治牛貝殼粉)，甜品(蕃薯餅)，仲有生果藍莓，全部材料都對狗狗有益，食多D都唔怕
翠玉瓜 : 營養比一般瓜類豐富，含豐富胡蘿蔔素，蛋白質，維生素A，B1，B2，C同E，其中所含的維他命A，碳水化合物及纖維，怩常吃的節瓜，絲瓜高，其中維他命A對小狗眼睛有良好幫助
吞拿魚 : 含豐富的蛋白質，礦物質，維他命，Omega-3S脂肪酸及DHA，有助腦部發展及眼睛視力的健康
乳酪 : 含豐富維他命B12，鈣，鈣質可強化骨骼，預防骨質疏鬆，並降低膽固醇
甘旬 : 含豐富胡蘿蔔素，維他命A，B，C，D，E，K，鈣，鉀，鐡，纖維含量極高，其中胡蘿蔔素有抗氧化及抗癌功效，有助狗狗眼睛健康，更有效降低膽固醇，血壓等功效
牛肉 : 脂肪少，是高蛋白質低脂肪的肉類食品，含豐富蛋白質，脂肪，維生素B1，B2，鈣，鐡，能增強免疫機能，強壯筋骨功效
蕃薯 : 含豐富維他命A，B，C，E，澱粉質及纖維，能幫助狗狗改善便秘及血管硬化等
雞蛋 : 含豐富蛋白質，維他命A，B，D，鐡，鈣等礦物質，維他命對狗狗眼睛有良好幫助，維他命D有助吸收鈣，鋅是皮膚和毛髮必須的礦物質，亦有助降低膽固醇
藍莓 : 含豐富鉀，纖維素，維他命A，C，E及其他多種維生素同礦物質，能預防癌症及心臟病，亦有護眼功效
唔駛10分鐘，BB已經全部K.O.晒，仲好似唔夠食，BB永遠都係袁太廚房出品的食物捧場客 !
狗狗SET DINNER食譜
前菜食譜(翠玉瓜吞拿魚乳酪沙律) : 翠玉瓜(半條)，礦泉水波吞拿魚(1罐)，乳酪(1湯匙)
做法 :
1. 吞拿魚瀝乾水份，用叉揉碎後備用
2. 翠肉瓜去皮洗淨後切粒，隔水蒸10分鐘後與吞拿魚碎拌勻
3. 再加入乳酪拌勻即可
****************************************************************************************
主菜食譜(甘旬免治牛貝殼粉) : 甘旬<半條>，免治牛肉<$15>，貝殼粉<1杯>
做法 :
1. 燒滾水，將貝殼粉放入煮8分鐘，盛起備用
2. 甘旬去皮切粒放入鑊中爆香，加入少許水煮至收乾水份或甘旬粒軟身
3. 加入免治牛肉拌勻炒至牛肉熟透，再加入貝殼粉兜勻，煮約3分鐘即可
****************************************************************************************
甜品食譜(蕃薯餅) : 蕃薯<1個>，雞蛋<2隻>，麵粉<50g>，水<適量>
做法 :
1. 蕃薯去皮切片，放入鑊中隔水蒸10分鐘至軟身，趁熱將蕃薯壓成蓉
2. 雞蛋打發好後加入麵粉，水拌勻成粉漿
3. 用廚房紙抹少許油在平底鑊中燒熱，放入適量麵糊，並放上適量蕃薯蓉作餡料
4. 用慢火將底部煎熟，再於面上放入適量麵糊，反轉煎至兩面金黃色即可
BB SET DINNER終於完成左喇，BB好似等得好心急咁喎，不過等媽咪影埋相先喇好唔好 ???
將蕃薯餅同藍莓切成細細粒，BB就容易入口喇 !
感謝 袁太廚房 提供以上資料
個人日誌: http://elanie-kitchen.blogspot.hk/
