袁生某日突然話想食東坡肉，吓...東坡肉好似好難整，我之前都未整過，你想食都得，不過到時唔好話難食就得喇，因為袁太真係冇咩信心，袁太對住冇咩信心煮得好的時候，梗係上網search下有關資料，睇睇下好似唔係太難，不過都要炆一小時，去街市買舊靚五花肉，就可以開工
袁太一路係廚房整，袁生就一路問"攪唔攪得掂呀???" 唉...我攪唔攪得掂你都要食，你唔好唔記得係你叫我整，經過一小時的炆煮後，又係袁生試味的時候，試味後個評語係"味道幾好，唔錯唔錯"
聽到袁生話味道唔錯，咁我係廚房整咁耐都冇白費，不過袁生轉頭又話，而家有東坡肉，但我又唔想食飯，不如煮米線，我頂...唔食飯又唔早講，不過好彩我未落米，另外雪櫃仲有少少小棠菜，有濃湯寶雞湯味，一於方方便便整個雞湯米線，加埋東坡肉，嘩...好滿足呀~~~
東坡肉雞湯米線
材料(東坡肉) : 五花肉<1斤>，薑(拍爛)<4片>，蔥段<適量>
調味料 : 酒，滾油，老抽，生抽，糖<適量>
材料(東坡肉雞湯米線) : 已煮好東坡肉<適量>，小棠菜<半斤>，米線<半斤>，鮮雞濃湯寶<1粒>，蔥粒<適量>
做法 :
1. 五花肉洗淨後，放入滾水內煮約20分鐘
2. 盛起放入冰水內浸30分鐘，每15分鐘換一次冰水
3. 將五花肉切成三分厚，準備一個瓦煲，燒熱後加入少許油，爆香薑片和蔥段後，加入五花肉，調味料
4. 用慢火炆煮1小時或肉腍身，將冰糖加入待溶，熄火待涼將五花肉切件備用
5. 燒滾水，加少許油，將小棠菜洗淨後放入煮約5分鐘，盛起
6. 煲內放入適量水及鮮雞濃湯寶，待滾後加入米線煮6分鐘
7. 將米線及雞湯放入大碗內，再加入小棠菜，東坡肉，最後灑上少許蔥粒即可
感謝 袁太廚房 提供以上資料
袁太廚房 的個人日誌: www.elanie-kitchen.blogspot.hk/
