早排出過一篇名為「風涼話」既網誌，其實自己知道係好少事，不過就好受刺激，好炆，仲喊；剛過去既星期一又有類似既事件發生，同樣係好少事鬧到好大，我仲除左件羽絨掉左o係酒樓（當晚著住羽絨等車都覺凍，之後可能太激氣，唔著褸行返同一條路完全唔凍），一支箭標左返屋企，估唔到事隔幾日，又再為同一件事嘈，情緒又好波動，又喊…老公抱抱，原來已經唔喊，摸摸丁叮，眼淚又流落黎…o個刻只係想喊，已經唔關之前同阿媽嘈既內容。或者內容已經唔係重點，只怕坐月成個月對住阿媽，唔知又有ｄ咩刺激倒我，又會失控…引發產後抑鬱，情況可大可小…
原本想請陪月，阿媽話佢廿四小時唔好過陪月o個八個鐘？仲有唔夠一個月就生，相信到時已經冇事，不過唔知會唔會有咩新衝擊；尋晚唸，如果阿媽唔同我坐月，或者比到時o係度激我還好，最多冇人幫我補身，好過情緒再受刺激…我相信初為人母，心情愉快比坐月補身重要。
返埋今日就放假喇，但係成個星期心情都唔好，係天氣問題？阿媽問題？
好彩有老公o係身邊，同埋嘈吵既對象唔係佢…喊既時候有人抱抱安慰
老公話今晚出去食飯慶祝last day，開開心心迎接悠長假期～^^
============================================
感謝 Scorpio 提供以上資料
Scorpio的網誌: http://scorpio3210.blogspot.hk/
============================================
