今日係最後一日返工, 聽日就開始放產假喇~ 早2星期甚至一個月已經有d唔捨得, 但係黎到最後一個星期反而期待居多~
記得上次離開舊公司係出發去honeymoon同一日, 周圍同同事影相, 影下個環境咁, 不過之後一次都冇返過去, 可能因為上次唔係自願走既, 返去都冇意思, 只有同幾個較熟既舊同學聯絡, 主要都係o係fb, 見面次數唔多。
到左今次, 係我自己決定要離開, 呢度都好多好好人既同事, 同我交流懷孕同育兒既心得, 2位副校都好好, 尤其有一位剛剛生完小朋友, 好照顧我, 成日叫我唔好舉手, 慢慢行, 頭先仲同我分享見紅穿水等經驗, 亦送左份禮物俾丁叮, 仲叫我生左記得sms佢同大家報喜, 真係好感謝佢。
原本有一位同事同我差唔多日子預產, 奈何因為一件小事嬲左我2個月, 我最近先知咩事, 同佢道左歉, 叫做講和, 不過已經冇兩句…
呢2個星期慢慢執野返屋企, 再過唔夠3個鐘就要離開喇, 打算12朝過後叫老公送d薑醋黎, 有時間既話希望可以整d cupcake返黎向大家道謝。
o係呢度年半既時間, 多謝大家照顧。
離開左呢度, 除左準備展開我既湊仔生涯, 亦係另一項事業既新開始~ 當年婚後失業, 未搵呢份工之前開左happinesskingdom網上店, 黎緊因著湊仔呢個契機，終於有機會實行全職整餅(+湊B) 希望能夠有時間設計更多種類既產品，開托暑假同小朋友既市場，呢幾日都有若干查詢，希望一切順利。^^
唔知丁叮選擇幾多號出世，o係佢正式黎到我地屋企之前，好好享受餘下既閒暇，享受下最後既二人世界，享受下老公返工後一個人既平靜。相信唔駛一個月，丁叮就會降臨，四月忙碌既坐月生涯過後，迎接五月既新挑戰～
============================================
感謝 Scorpio 提供以上資料
Scorpio的網誌: http://scorpio3210.blogspot.hk/
============================================
