剪/唔剪!?

之前同一位醫生朋友傾過，佢話唔剪個傷口會爆得好核突，剪好Ｄ。有Ｄ產婦剪完之後話唔聯針，呢個時間先嗌痛（因為生既時候太痛，剪o個下根本唔識得痛）話唔剪，佢話佢會俾塊鏡佢地睇下咩樣…仲聯唔聯…

頭先上BK見倒相關討論，原來依家QE可以俾你揀剪/唔剪，有份同意書俾你填，醫生話以前就多數剪既，依家可剪可唔剪。唔知其他政府醫院得唔得呢？

睇返一Ｄ媽媽既經驗之談，多數都話唔剪好。剪的話，好易生，但傷口聯針後會痛幾星期至一個月；唔剪的話好難生，生既時候好痛，不過生完好快唔痛。雖然都會爆少少／損少少，都要聯一兩針，不過多數都唔痛。

咁睇好似唔剪好Ｄ喎。

不過醫生／助產士俾得你唔剪應該都係夠大先得，所以亦可能因為咁，聯既針數唔多，所以亦唔係咁痛。

有一位唔好彩既媽媽遇著實習醫生（有一位高級醫生傍住）聯錯左，搞左成粒鐘…痛死…有一位姑娘聯錯針聯左Ｄ好肉，要拆左佢聯過…有Ｄ話會打麻醉針先聯。

政府醫生儀器先進，有咩早產急症都係送返你去政府，不過最大問題係遇著實習醫生，而呢個機會似乎幾大，我就寧願由助產士操刀…

============================================

感謝 Scorpio 提供以上資料

Scorpio的網誌: http://scorpio3210.blogspot.hk/

============================================