趁今天有些空閑時間，要努力補返過去幾個月影咗相又未寫嘅blog。本來今日係要吸塵洗地嘅，不過昨天好可憐打爛咗le Creuset 迷你焗盅所以逼住已經吸咗塵拖好地。
由舊年11月開始我好似忙到依家忙到冇停過，唔係忙玩就係病，睇來我要玩多啲��！11、12月樓上油油，聖誕家庭聚餐，1月我屋企搞camping,
camp之後一星期我就病倒了。其實我一向好少病，marco 笑我(結婚）十二年後out of
guarantee。一月尾開始咳得好嚴重，我自我隔離瞓咗一個星期瞓梳化，煮食都冇精神，於是乎仲教識咗當時差唔多七歲半嘅車輋自己開火煮
食，Marco都買咗好多晚外賣回來，有一晚我同車輋講媽咪今晚都係煮唔到，想話爸爸問佢想食乜？未問佢已經問返我，「咁你想我煮乜吖？」
我當時好多痰咳到真係嘔，醫生要我食抗生素，聞氣，食完都仲未好返晒，二月頭仲開始塞埋耳仔。呢個時候仲落咗場大雪，因為要送車輋同佢同學去游水，第一次
喺雪地揸車，其實條行車路係冇雪，因為已經好多車行過，不過去到停車場就出事，marco明明話我架車有冬天軚唔使驚，不過都喺啲雪度卡住，依家諗返轉頭
都幾好笑。
之後開始好D，冇再有痰，淨係乾咳，不過耳仔一直塞住，唔係話好嚴重不過就聽力好似弱咗20-30%。年初一至四有香港朋友嚟探我，又玩咗幾日仲去埋瑞士
outlet shopping, 朋友嚟我度之前喺瑞士滑雪整親舊患，我哋一個行動不便，一個聽唔清楚，但係shopping意志力仍然好強。之後初十香港大表姐嚟開米蘭又同表姐夫嚟咗brescia探我哋。
年十一玩完飲茶團拜第二日，耳仔塞左差唔多一個月，終於約咗睇耳鼻喉專科。主要係右耳塞住，醫生話係啲痰上咗耳仔，變成好似膠水咁樣塞隻耳又要再食抗生素好在食咗一個星期之後終於叫做好返。
唔覺唔覺又已經到咗三月中，開始為暑假家人嚟探我旅行籌備。其實我2014年回顧仲未寫�� 其實冇乜嘢特別，不過主要係想記低我2014年有讀完新舊約聖經一次。我係跟住呢個網站（
http://www.glorypress.com）嘅每日讀經編排，選擇咗一年讀完聖經一次，都唔係太難跟。今年2015年，我就選擇左兩年讀完一次，輕鬆地重溫。
好嘞，講完一輪，入返正題講返之前影咗嗰啲相。
係中國超市第一次見到有糙米，真空包裝好似幾靚仔，買咗包返嚟試。
第一次㷛，成煲變成粉紫色，車輋問我係唔係甩色我check吓包裝，我話係泰國製造，唔係中國，應該唔會掛��。
我煮咗一個青咖喱羊去配呢個糙米飯，唔錯喎，因為有混合正常米，所以其實唔係好覺糙米，但係感覺健康D，仲整咗糙米飯團俾車輋。(飯團相係之前影嘅普通米飯團）
