唔好以為沙律係西式嘢，其實中菜都有沙律，或者呢D係為咗迎合老外嘅口味，不過在中菜館不難找到Chinese salad，即係雞沙律，不過呢次我整呢個係家庭版本，冇咁多煎炸工夫，只因為李生鍾意食出面中餐館嘅中式雞沙律，所以做太太嘅就嘗試去將外賣菜式在家中還原，像真度90％以上。
材料：
生菜 1個
雞胸肉或雞脾肉 1塊
調味醬汁：
鹽 半茶匙
大紅浙醋 1湯匙
豉油 1湯匙
美極醬油 1湯匙
老抽 1湯匙
糖 1/4茶匙
蜜糖 1茶匙
乾紅椒粒 少許
黑胡椒碎 少許
蒜蓉 1至2粒
做法：
1）生菜洗淨切細絲，瀝乾水份。
2）雞肉去骨焗熟或煎熟，放涼切幼絲。
3）將調味放入碗中拌勻。
4）將生菜絲墊底，上面放雞肉，食時淋上調味醬汁拌勻即可。
小貼士：
1）出面中菜館的中式雞沙律一般會加入炸粉絲或炸蝦片，迎合老外鍾意香口的口味，住家飯菜就可以唔加都冇問題。
2）喜歡食海哲嘅可以加入即食海哲同食，不過出面買嘅即食海哲味道麻麻，不加不可惜。
3）個人口味可以加入其他調味，例如椒醬、麻油、芝麻等，這個只係根據李生鍾愛餐館醬汁去泡製。
後記：
呢個係我自己帶嘅午餐盒，加咗海蜇，但包即食海蜇個質感同味道都差強人意，勉為其難食晒只為唔浪費，但下次一定冇交易，唔會再買呢一隻，最衰係唔識整海蜇，NO，應該話自己發海蜇太多工夫，細個時見過兩個契哥整，係要啤水發足兩日，仲係要不停咁過水，以而家環保角度實在不容許。
