成為探險家 探險家登入
探險家攻略  >  食譜  >  主菜  >  美式肉餅 Meatloaf
0

美式肉餅 Meatloaf

由 花旗太太 於 2012-02-22 00:00:00 發表  |  累積瀏覽 365

分類：主菜
今次整咗美式肉餅，呢種叫Meatloaf，係用焗爐焗嘅，同中式肉餅大同小異，有人會用呢個肉餅做三文治。我整呢個係我自己嘅版本，放咗好多蔬菜，唔係因為要仔仔食蔬菜，相反係要佢食肉，我對仔女之前都講過，係草食生物，唔鍾意食肉，但就食大量蔬菜瓜果，佢地唯一喜好嘅肉係魚，雞都會食，至愛係雞翼，雞脾一時時，整得鞋少少嘅雞會吐渣，瘦肉太瘦唔食，太肥咬唔開又唔食，真係想打巴佢地（細聲D，呢邊打仔係會俾人拉架）。不過，哥哥同豬扒妹都鍾意食肉丸，魚蛋直情係恩物，所以今次整咗兩個版本，不個係氹小朋友嘅心型星型肉餅（丸），另一個係正常meatloaf，俾李生帶飯，如果我俾D心型星型李生拎去做午餐，我驚佢唔肯，男人老狗拎個咁嘅飯盒，有D那個少少嘛。




材料：
豬肉 1磅
牛肉 3/4磅
洋蔥粒 半個（約半飯碗）
紅蘿蔔粒 數條（約半飯碗）
西芹粒 1條（約半飯碗）
麵包 2至3塊
牛奶 8安士（約240ml）
蛋 1隻
巴馬芝士蓉 2湯匙(Parmesan Cheese)

調味：
豉油 1-1/2湯匙
麻油 1-1/2湯匙
鹽 1茶匙
黑椒碎 半茶匙
芫茜碎 2湯匙

Optional：
辣椒醬或汁    1湯匙
蜜糖 1湯匙

煮法：
1）麵包撕成細片，約姆指上段大小，放碗內，注入牛奶，用匙略壓麵包片，務必全部浸入牛奶中，最少浸半小時至麵包吸收大部份牛奶。


2）豬肉、牛肉刴碎或買已攬碎之免治肉，加入調味料拌勻。


3）洋蔥、紅蘿蔔、西芹切細粒，越細越好，我係切約2mm至3mm大小。







4）肉醃約半小時後將所有蔬菜粒拌入肉中，倒入麵包及牛奶一併拌勻，攪至略有少許黏性。


5）加入雞蛋再拌勻。
6）最後加入芝士拌勻。
7）焗爐預熱400度F（約200度C）15分鐘。

心心星星肉餅造型：
1）將肉續少放入模具中，尤其是星型模，要壓得實淨同務求星星起角部份都有肉填滿。
2）除模放焗盤中，放入焗爐，先以400度F（約200度C）焗10分鐘。


3）將焗盤前後掉轉再較細個火至350度F（約180度C）多焗10分鐘。
4）反轉肉餅再焗8分鐘即成。





普通meatloaf做法：
1）將肉倒入已掃油之長方形焗盤內。


2）先以400度F（約200度C）焗10分鐘，之後較細火至350度F（約180度C）焗30分鐘。
3）取出焗盤，於肉面掃上辣椒油或醬，再淋上蜜糖掃勻肉面，放入焗爐再多焗15分鐘，攤凍少許將肉餅切片就可以上碟。



  


小心得：
1）如果鍾意食辣，可以於拌肉時加入紅椒碎及辣椒醬調味。
2）蔬菜同芝士份量可隨意加減。
3）蔬菜最好切得越細粒越好，方便拌勻入肉中，但不建議磨成蓉，因為想食到有蔬菜口感。
4）有人會加入蕃茄醬，但我個人覺得蕃茄太搶味，我想有肉味又食到蔬菜。
5）如果做成細粒肉丸，不必要焗太耐，15至20分鐘已經足夠，只要用牙籤拮入肉中拉出，不見有肉黏上或血水流出就已經熟。
6）拌勻肉同配料時最好用手，因為可以較為均勻，同時用手將麵包搓入肉中。

後記：
呢個係哥哥嘅飯盒，佢自己揀咗心心型，我話不如帶三個心心加兩個星星啦，加埋炒白菜膽墊底。
  

呢兩個係李生李太嘅，又係一大堆瓜菜墊底加肉餅，當然唔可以整得咁cute（低能）啦，





李生食完話正，已經order第二日再帶埋餘下嘅肉餅，仲叫李太去買肉再煮。哈哈，佢鍾意就得啦，要湊為食哥哥同為食李生真係少D心機都唔得。

感謝 花旗太太 提供以上資料
花旗太太的網誌:http://rosemaglive.blogspot.hk/
鐘意SeeWide的分享，給我們一個Like吧！
  • 攻略日期：N/A
    攻略地點：N/A
  • 攻略時間：N/A
    是次消費：N/A
共0人比"掂"

最多能輸入300字

花旗太太
中級探險員
簡介：來自香港的揚眉女子，來到花旗國落地生根，在博客空間...

累積瀏覽 197076

全部攻略 372

全部回應 23

首頁   探險家攻略   香港好去處   探險家排行榜   新手指南   聯絡我們

©2012-2024 SeeWide.com 「All Rights Reserved 版權所有，不得轉載」

網站上的資訊及圖片，若閣下為部份資訊的版權擁有者，如有觸犯你的知識版權，請來信info@seewide.com，我們接到投訴後即時處理

重要聲明：本網站是以即時上載留言等方式運作，對所有留言的真實性、完整性及立場等，不負任何法律責任。而一切留言之言論只代表留言者個人意見，並非本網站之立場，讀者及用戶不應信賴內容，並應自行判斷內容之真實性。由於本網站受到「即時上載留言」運作方式所規限，故不能完全監察所有留言，若讀者及用戶發現有留言出現問題，請聯絡我們。

SeeWide 香港特搜 致力打造 香港好去處、活動 指南，聚集全港探險家，一同搜羅及分享精彩的 玩樂、消閒、香港好去處 等情報，務求讓大家能看多一點、闊一點！