成為探險家 探險家登入
探險家攻略  >  美食之旅  >  餐廳  >  好晚嘅晚餐＠Fujiyama-ya Japanese Restaurant
0

好晚嘅晚餐＠Fujiyama-ya Japanese Restaurant

由 花旗太太 於 2012-02-21 00:00:00 發表  |  累積瀏覽 350

分類：餐廳 ；地區：美國
2012年2月11日（星期六）

因為去完農曆新年花車巡遊，之後又送番伯伯返屋企，所以是日晚餐係好晏至食，平日我地一家6點半前開飯，呢晚係8點9，仲要係坐低叫至有得食，哥哥其實已經餓到個肚仔扁咗啦，豬扒妹都少有會扭肚餓。我地呢晚係同Tommy同Tommy仔食飯，Tommy仔仔好斯文，又有禮貌，唔似我家哥哥咁嘈，不竟Tommy仔都已經13歲，下一年就升高中啦。因為就番Tommy住同送伯伯返屋企，又唔想花費太多，所以我地去咗我地好鍾意去嘅一間日本餐廳，唔好以為日本餐廳一定貴，無錯好多日本餐廳都收得貴，但呢一間係好合理架，當然要將貨就價啦，唔一定所有食材都一流嘅。

先嚟麵豉湯，係送嘅，待應好鬼貼心，我地大人嘅湯有蔥花，小朋友果D冇。








呢個係李生李太好鍾意嘅日式廚師沙律，$3.95算好大碟，最正係個醬，應該係芥末蜜糖汁，聽講係自家調製，我成日想打探點整。



我兩個小朋友最鍾意食枝豆，$2.5一大碟，特別請待應姐姐唔好灑鹽上面， 呢度得番半碟，因為一放低李生已經要招呼好肚餓嘅哥哥同豬扒妹。







日式鮫子，都算有水準，係唔係好大隻，不過都係果個字「抵」，$4.25一碟有8隻架，唔知邊個喺我未影相前就夾咗一隻呢？



呢一個係蔬菜卷Green Roll$3.95，有豆角、青瓜條、牛油果、露荀同紫菜，因為哥哥同豬扒妹係草食生物（唔知點解鍾意食瓜果蔬菜唔多食肉），而且小朋友唔應該食魚生住，所以呢個係叫俾佢地兩個食，以前佢地唔食壽司，而家大個咗要學大人。 



先嚟兩款剌身：青魽魚Hamachi新鮮肥美，$6.95一份，呢度應該係兩份，Tommy同李生上次一食愛上，今次又encore~



三文魚Salmon，李太係超級剌身迷，食得好鬼開心。我連伴碟果D白蘿蔔絲都好鍾意架。 



呢個係Dragon Roll，即係燒鰻魚加天婦羅壽司，係李生至愛，不過佢唔好鰻魚上面果D魚子，$7.95一條。


呢一碟係三種壽司卷拼埋一碟，右上方有橙色醬果隻係辣吞拿魚壽司Spicy Tuna Roll，抵食又好食，呢度6件先$2.95，右手前面係Rock & Roll，有牛油果同鰻魚，又係抵食嘅$2.8， 左邊係青魽魚Hamachi 壽司，$1.4一件，食完剌身都未夠喉，encore多一次壽司版本嘅青魽魚。



Rainbow Roll係用唔同嘅魚組成，有吞拿魚、油甘魚、三文魚、青魽同蝦，包住加州卷，個樣幾靚，雖然不至於有彩虹七色，但好食又算幾抵$5.95一碟。後面係encore之前嘅辣吞拿魚壽司卷。



再一個Caterpillar Roll，有好多牛油果包住燒鰻魚壽司，上面舖魚子，真係幾似一條蠶蟲，但豬扒妹望住有D驚，當然生嘢佢唔食得啦，多謝$5.95。



哥哥豬扒妹嘅雜菜烏冬$5.95，呢個係冇加蛋版本，兩個B幾乎分晒成碗。



後加嘅炸野菜天婦羅Vegetable Tempura$4.25，有蕃薯、豆角、西蘭花、椰菜花、薯仔同矮瓜，正過食炸蝦，我最鍾意係炸蕃薯同炸薯仔。



最尾加嘅呢個炸帶子，一來唔夠新鮮，二來太細隻，唔怪得價錢唔太貴，下次唔會叫呢個啦，哥哥要幫手搾檸檬汁。



好得人驚係我地三大三小居然食得晒咁多嘢，我地兩大兩小平日都係食到一半，今日多咗Tommy同Tommy仔，居然食多咁多。






最後小朋友嚟個綠茶雪糕。


Tommy好鬼客氣，係都要請客，話因為李太生日果晚借咗李生，要請番李太食飯，呢一餐都幾係嘢架，未計tips $119，但李生同Tommy飲咗兩三枝sake，如果以咁多碟同sake($3.95@)嚟計，如果去Japantown果D日本餐廳，再多一倍至落得樓，所以我地鍾意嚟Fujiyama Ya，家庭式日本餐廳，唔駛著靚靚，招呼又好好，侍應Esther好好人，對我地有求必應。

Fujiyama-ya 位於三藩市Sunset區，地址係1234 Noriega Street（夾19th Avenue 同20th Avenue），星期一至日開5pm-10pm，電話係(415) 665-1772，我地鍾意早食，因為唔駛等位，唔係冇位就要喺早面食完西北風先，泊車尚算方便，我地早到通常都可以泊到門口車位，但一般都唔會要行多過兩個街口。

感謝 花旗太太 提供以上資料
花旗太太的網誌:http://rosemaglive.blogspot.hk/
鐘意SeeWide的分享，給我們一個Like吧！
  • 攻略日期：N/A
    攻略地點：美國
  • 攻略時間：N/A
    是次消費：N/A
共0人比"掂"

最多能輸入300字

花旗太太
中級探險員
簡介：來自香港的揚眉女子，來到花旗國落地生根，在博客空間...

累積瀏覽 199284

全部攻略 372

全部回應 23

首頁   探險家攻略   香港好去處   探險家排行榜   新手指南   聯絡我們

©2012-2025 SeeWide.com 「All Rights Reserved 版權所有，不得轉載」

網站上的資訊及圖片，若閣下為部份資訊的版權擁有者，如有觸犯你的知識版權，請來信info@seewide.com，我們接到投訴後即時處理

重要聲明：本網站是以即時上載留言等方式運作，對所有留言的真實性、完整性及立場等，不負任何法律責任。而一切留言之言論只代表留言者個人意見，並非本網站之立場，讀者及用戶不應信賴內容，並應自行判斷內容之真實性。由於本網站受到「即時上載留言」運作方式所規限，故不能完全監察所有留言，若讀者及用戶發現有留言出現問題，請聯絡我們。

SeeWide 香港特搜 致力打造 香港好去處、活動 指南，聚集全港探險家，一同搜羅及分享精彩的 玩樂、消閒、香港好去處 等情報，務求讓大家能看多一點、闊一點！