聖誕節個個都整薑餅人、薑餅屋，我都想同哥哥、豬扒妹整，但呢排公私兩忙，公司已經忙到水唔得閒飲廁所唔得閒去，電話一個接一個，永遠有未完未答emails，眾多同事放假，我是留守其中一員。屋企方面又要焗曲奇、又要準備禮物、寄聖誕咭（係呀，美國呢邊已經好發達，但親朋傳統上還是會互寄聖誕咭）、plan冬至聖誕晚餐。。。雖然一個薑餅屋未必要花好多時間，但工作一整天回家，食完飯做完一切雜務已經離一對兄妹上床時間不遠，在這有限時間可以點？想到呢個DIY，都係薑餅屋，都係食得，都要落手落腳整，小朋友都會開心。
整嘅過程因為multitask幾樣嘢，唔記得影低相，只有完成品嘅相，希望睇到會估到點做啦。
材料（每一間）：Gradham crackers 7塊、軟糖（我用咗Gummy Bears同Jelly Beans）、朱古力豆（呢D係M＆M）、裝飾cupcake用糖霜(icing sugar)、紙碟一隻。
做法：
1）4塊crackers圍成一個立體四方形做薑餅屋嘅牆，每塊之間用糖霜接合，糖霜乾咗就會變硬。
2）蓋上另一塊cracker做屋頂，再以另外兩塊crackers做成尖頂部份。
3）以糖霜將軟糖、朱古力豆黏在餅屋上裝飾。
4）最後餅屋底部塗上糖霜，黏在白色紙碟上就係一個雪地薑餅屋。
哥哥話果枝棒棒糖係樹，小朋友想像力真好。
![]( "P1080212")
哥哥食緊枝mint chocolate捧捧糖，所以咀邊仲有白色朱古力，如果佢係偷食一定走唔甩。
妹妹都有樣學樣，佢都有棵樹喺屋外。
哥哥話個mailbox甩咗（白色糖霜果個位原本有粒軟糖），但佢整跌咗，所以就食咗落肚。
呢個係豬扒妹嘅，屋頭冇哥哥砌得咁多咁靚，但屋嘅底部就圍滿bear bear。
到臨瞓前，哥哥已將屋頂上同周圍嘅軟糖、果汁豆食晒，仲偷偷地食埋豬扒妹果間，攪到妹妹發脾氣，最後當然俾李太教訓一番，因為已經咁夜，我地規定過咗8點唔可以再食甜食，糖係BIG NO NO。
感謝 花旗太太 提供以上資料
花旗太太的網誌:http://rosemaglive.blogspot.hk/
