李生係瘋狂地鍾意食油條，但可惜三藩市油條嘅水準真係非常不濟，遠遠不能同香港嘅油炸鬼比較：唔係唔脆唔鬆就係太油，一口咬落去就覺得係咀嚼成口油，偏偏個價錢就貴到冇人信，由美金$2.25到$3一條不等，如果香港賣白粥油炸鬼嘅移民過嚟，只要手藝好，將會不愁搵唔到錢。李太每次去餐館見到menu上有油條都會點俾李生食，或者遺傳自李生，豬扒妹同哥哥都好鍾意油條，特別係哥哥，已經去到同李生爭食嘅地步。
無意喺FB中見到有位女士教整油條，初初只係抱住積管睇吓嘅心態去睇，因為以前曾經網上搜尋過油條食譜，一大堆咩臭粉咩發酵等等已令我卻步，但呢一個食譜睇落都好簡單，材料都唔多，步驟係多少少，但唔難整，不過要隔晚搓定粉，煮嘅時間亦都唔太長。
![]( "P1080487")
材料：
低筋粉 7安士（我冇低筋粉，所以用咗4安士中筋粉加3安士粟粉）
發粉 3 1/2茶匙（baking powder）
鹽 少許
菜油 3茶匙
水 3.5安士
做法：
1）低筋粉過篩，加入發粉、鹽、菜油同水拌勻成一個麵團。
![]( "P1080459")
2）將麵團放入大碗中，以保鮮紙蓋住，靜待一小時。
![]( "P1080460")
3）之後拍打麵團約5分鐘，方法係由麵團底一邊拉起再蓋到麵團另一邊，之後以拳頭輕力拍打一下，又由麵團另一個位置以相同方法拍打，做10次後底面反轉麵團，用相同方式又做10次，約做5分鐘。
![]( "P1080461")
![]( "P1080462")
3）將麵團放入膠袋中紥緊袋口置雪櫃中落夜，我用一個細密實袋，非常方便。
![]( "P1080463")
4）第二日取出麵團置室溫45分鐘。
5）之後於工作台上掃油，放上麵團，搓成一條長條，約為兩隻手掌長。
6）用手指壓成約半cm厚度、食指長度麵團，用刀切齊頭尾部份。
7）將麵團每2cm切成幼條，兩條麵條面對面重疊，以長燒烤叉於麵條中間壓出一條痕。
