好好笑:
計起上來,葉劉淑儀是我港大師姐,早過我四年畢業,仲係英文系一級榮譽生添。
讀書佢叻過我,做官又高過我,做過保安局長,而家係立法會議員、行政會議成員。議事堂中,雖然有特權法保護講咩都得,無刑事責任,但所有內容都要自己負責者也。何況講嘢有錄影,記錄會公開,講嘢太粗疏、犯上低級錯誤,俾人笑到面黃,亦係應有此報焉。
教育政策委員會上發言,談李白扮晒引經據典;所謂隔行如隔山,英文你係叻,唔該睇D中國文學入門書先好講李白。「根據百度,李白係唐朝巴郡人,即係隴西...」
講李白籍貫,就算你唔quote正史「新唐書」,你都講預科生用的「劉大杰:中國文學發展史」吖!你貪方便上網查,用百度(點解唔用 Google或維基?),好嘞好嘞,百度我從來唔用嘅,為着呢件事走去搵下。
百度講係「巴西郡」,唔係「巴郡」,巴郡係今日重慶呀,阿嬸!
李白祖籍隴西,但佢家族很多代已經在第二處生活,他本人更是出生於西域「碎葉城」,位於今日中亞細亞嘅吉爾吉斯,幾歲大返回中原,係甘肅個頭居住。
近代文學家李長之,有本講李白生平嘅書仔「道教徒的詩人李白及其痛苦」,我推薦俾所有中學生,因為實在好睇。本書開頭就有考證:
仲有,「李白唔會用廣東話寫詩」,咁你即係以為香港素來用廣東話教中文,就等於要學生用廣東話寫書面文字乎?有無白痴D㗎?
中國千百年來,各地人民讀書識字,都係用家鄉話讀書,至於寫文章吟詩作對呢,就用全國統一嘅書面語(以前係文言,而家係白話文)架喇。有D人叻唔切,要香港人而家轉用普通話教同學中文,以為一定好過用廣東話,可以提高學生中文水準。
你~以~為~啦!
唔寫「主意」寫「點子」、唔寫「黃芽白」寫「大白菜」、唔寫「超卓」寫「很牛」,夠普通話啦呱,但咁就係好中文?
梁啟超十幾歲就中秀才、舉人,話佢中文唔好,你都唔會相信;但係佢唔識講北方「官話」,搞到光緒帝召見佢講新政時,直情雞同鴨講,無法溝通。
國學大師錢穆中文好唔好?但係佢係家鄉讀書,落來香港幾十年,作育英才,教出好多中文博士。佢教書時講嘅話,係濃重無錫口音嘅「類似國語物體」。
毛澤東詩詞,有D人當文學傑作嚟欣賞,你聽過毛主席講普通話未?https://www.youtube.com/watch?v=Iw0i3YgMF9U (渣過好多香港人)。
「識咗普通話,就更加知道廣東話 覺/國、燉/鄧 嘅分別」??
我家族中的長輩,叔伯同姑母,無一個人識講普通話,佢地講廣東話雖然有順德口音,但點會分唔到 「覺/國、燉/鄧」?阿嬸你柒少陣好唔好?
。。。。。。。。。。。
*倘有留言未能即時上板,是自動過濾去了spam之故,諸君稍安無躁,版主每日檢查幾次,一有發現便會救回*
(文章允許轉貼,請具作者名字:梁煥松)
============================================
感謝 子貓物語 提供以上資料
子貓物語的網誌: http://chrisleung1954.blogspot.hk/
============================================