出街食飯可以帶比我好多"煮意"，前幾日去筲箕灣民聲食飯，喺餐牌見到呢道菜，因為一碟得一隻蟹唔夠食，所以當晚冇叫到，不過我知老公好想食。(你地都知我全家係蟹痴)。琴日去街市見都細隻肉蟹，只係56蚊斤，三隻賣74蚊咋，就試整比老公同Owen。
煮之前一路構思點先可以蒸蛋滑滑而d蟹又夠熟呢，最後諗到呢個辦法，真係好Work,
咁整d蛋好滑，好香蟹味，d蟹又勁鮮甜，原汁原味難怪兩仔爺一路食一路問 －“點解好以咁好食o既 ， 一路睇住佢地食得咁開心，我都覺得好滿足啊，我諗呢d就係我煮野食o既動力呀。
食譜：
肉蟹3隻（中型）
蛋汁： 蛋5隻 ／ 雞湯＝蛋的1.5倍（份量已包括小量蒸蟹汁，記住先隔渣）
-蟹洗淨，斬件，排在深碟中，蒸十分鐘，離鑊，拿起蟹蓋，倒起蟹汁
-加入蛋汁，用錫紙封面，大火蒸8分鐘，放回蟹蓋，再蓋上蒸2分鐘蒸蛋熟透。
**哈哈，個玻璃兜已經唔細(所以要用5隻蛋先夠)，但係仍都係o岩o岩好，連d蟹腳都犧牲晒，就連其中一個蟹蓋都放唔落，要另上呀。
**如份量多少，同容器o既質地都會影響製作時間（我用厚玻璃兜，無咁傳熱架），蒸的時間也應自行調節，唔係d蛋太老唔好食架。
============================================
感謝 Owenmama730 提供以上資料
Owenmama730的網誌: http://owenmama730.blogspot.hk/
============================================
