尋日行屋企樓吓個商場，見到有有機農場擺檔做宣傳。一包有機菜，只係買$10 ! 所以一下子，買咗幾包冷門啲o既菜種(俾多咗錢，梗係試啲平時食唔到o既菜)。其中一包係"日本小松菜"。老細話哩隻日本小松菜最啱就係做麵"底"。佢仲提我，唔好煮到過熟，因為個口感會冇咁好...可能我個樣似唔識煮野，老細仲教埋我，佢話用來放喺底，通常係露莖嗰面，唔係露葉嗰面 =P 好啦，照足老細咁講，影相又真係幾靚喎。
今次除咗用了有機菜，仲好環保咁用咗一啲煲完湯o既瘦肉，所以用柱候醬，味道濃啲，可以蓋過煲完湯啲味。
我覺得小松菜可能係菠菜啲親戚，口感有啲似菠菜，不過味道強啲。另外一題，原來有機菜真係好食啲，需然貴兩三倍，但係好有菜味! 值得一試 !
熟瘦肉 200克
茄子 半條,切粒
小松菜 1扎
上海麵 1個
糖 1茶匙
上湯 半碗
蒜蓉 1茶匙
1. 先將已熟的瘦肉切碎
2. 小松菜用滾水煮約2-3分鐘至熟透但仍"翠綠"(腍咗唔好食)，盛起備用
3. 上海麵用最少2公升水，煮至個人喜好的口感，一般來講，約4-5分鐘便可。盛起，放在小松菜上
4. 用中火，爆香蒜蓉後加柱候醬，拌勻後可加入瘦肉碎及茄子
5. 抄約2分鐘後，加入上湯及糖，轉大火再煮2-3分鐘，至醬汁開始變稠，將茄子醬淋在麵上再灑上蔥花即可
=============================================
感謝 自家廚房 提供以上資料
自家廚房的網誌: http://casacookery.blogspot.hk/
=============================================
