蝦刺身絕對係每一次食泰國菜必點的菜色。首先要申報，我係一個懶人，今次我只係做咗個蘸汁，蝦刺身是買已脫殼的冰鮮虎蝦刺身(所以喺相入面會見到啲蝦有啲扁扁地 ^_^"" 事實上，除咗超市的壽司冷櫃，喺香港我真係唔係太肯定係邊個地方可以買到刺身質素的新鮮海鮮，如果大家知道的話請通知我。
生蝦蘸汁，看似簡單(而實在製作都唔難)，最難係買齊哂啲材料，之後只要按個人口味調製即可。食譜入面用咗青檸汁，但青檸較貴同未必每個街市/超市都有，買唔到青檸的話可用檸檬汁代替，味道當然會差少少，但不失為一個辦法。
(可按個人口味加減)
青檸汁 2湯匙 (約2 個青檸)
魚露 1湯匙
蒜蓉 1茶匙
芫茜 1茶匙, 切碎
辣椒 1茶匙, 切碎
檸檬葉 1片, 切幼絲
糖 1/2茶匙
1. 將所有材料拌勻，讓味道混合最少15分鐘即成。
小貼士: 哩個蘸汁亦可當泰式沙律汁用，只要將份量加大即可。
=============================================
感謝 自家廚房 提供以上資料
自家廚房的網誌: http://casacookery.blogspot.hk/
=============================================
